Наш опрос
Оцените мой сайт
Всего ответов: 1
Мини-чат
200
Статистика

Онлайн всего: 1
Гостей: 1
Пользователей: 0

Главная » 2015 » Сентябрь » 21 » Бор көмүс күһүнэ - 2015
3:53 AM
Бор көмүс күһүнэ - 2015

Бор көмүс күһүнэ-2015

Бор ытык сирэ саха тыллаах баарын тухары талаан түспүт, чочуллубут сиринэн ааттана туруо… Бу алаас көй салгынын толору иҥэринэн, дьикти-мааны айылҕатыгар угуттанан,  кынаттанан тахсыбыттара саха народнай суруйааччылара, бөдөҥ общественнай деятеллэр, Саха сирин уонна Россия элбэх омуктаах литератураларын чиэстэрэ, суобастара буолбут, үгүһү, үйэлээҕи оҥорбуттарынан бар дьоннорун дириҥ  убаастабылларын ылбыт ини-бии Сэмэн уонна Соппуруон Даниловтар уонна чулуу уруһуйдьут, сахалартан бастакы академик ССРС, Россия, Саха Республикатын народнай худуоһунньуга Афанасий Осипов.

Сүдү дьоммут оҕо саастара ааспыт алаастарыгар «күһүн көмүс дуйунан сири симиир кэмигэр…» балаҕан ыйын 11 күнүгэр «Бор көмүс күһүнэ» диэн литературнай-поэтическай көрсүһүү  быйыл 5-с төгүлүн ыытылынна. Тэрийээччилэр – Кииннэммит библиотечнай ситим коллектива, директор Прохорова Мария Никитична. 

Поэзия түһүлгэтигэр кыттыыны ыллылар Саха Республикатын культураҕа уонна духуобунай сайдыыга миниистирэ В.И. Тихонов, «Горнай улууһа» Муниципальнай оройуон Баһылыга Н.В.Андреев, суруйааччылар, поэттар, суруналыыстар Василий Васильев – Харысхал, Анатолий Старостин – Сиэн Кынат, Айсен Сивцев – Айсен Дойду, Елена Слепцова – Куорсуннаах, Аита Шапошникова, Саргылана Гольдерова – Саргы-Куо, Галина Нельбисова, Александра Константинова – Дархаана, Иван Осипов – Уйбаан Ойуур, Любовь Горохова – Сүүмэх, Ангелина Васильева, Ангелла Попова, «Олоҥхо Театрын» дириэктэрэ Виталий Власов,  Хомус музейын научнай үлэһитэ Күн Алгыс, П.А. Ойуунускай аатынан Литературнай музей научнай үлэһитэ Николай Рыкунов,  Намнааҕы Кииннэммит библиотечнай ситим директора М.Р. Софронова салайааччылаах делегация, суруйааччылар төрөөбүт-үөскээбит нэһилиэктэрин дьоно-сэргэтэ – Мытаахтар, олор истэригэр Даниловтар музейдарын тэрийсибит, сүһүөҕэр туруорсубут, өр сылларга директорынан үлэлээбит РФ үөрэҕириитин туйгуна, СР культуратын  туйгуна Е.С. Максимова, биир алааска «эн-мин» дэһэн бииргэ улааппыт доҕордоро, педагогическай үлэ ветерана С.Ф. Филиппов, улууспут айар куттаах ыччаттара, «Сыккыс» литературнай түмсүү чилиэннэрэ, учууталлар уонна поэзияны таптыыр биир дойдулаахтарбыт.

Поэзия түһүлгэтин үөрүүлээх чааһыгар үгүс үтүө тыллар этилиннилэр. 2017 сылга Семен Петрович төрөөбүтэ 100, онтон Софрон Петрович 95 сыллаах үбүлүөйдэрин бары түмсүүлээхтик үгүс үлэни ыытан үрдүк таһымҥа көрсөргө ыҥырдылар.

Онтон бары «көбүөр – көмүс көтөҕөнү» кэһэн аа-дьуо Анюта аллеятыгар тиийдибит. 1943 сыллаахха Семен Петрович тапталлаа5ын Нам кыыһын Анютаны – Анна Семеновнаны атынан сүүуннэрэн аҕаларыгар Борго киириилэригэр, сайыҥҥы нуһараҥ киэһэҕэ эдэрдэри бастакынан, оччотооҕу сыарҕа суолун икки өттүгэр сэлэлии үүммүт, мааны бэйэлээх хатыҥнар уруйдуу көрсүбүттэрэ. 35 сыл устата дьалхааннаах олоҕун аргыһыгар, 35 сыл тухары үөрүүтүн-хомолтотун, түһүүтүн-тахсыытын тэбис-тэҥҥэ үллэстэн кэлбит холоонноох доҕоругар анаан, тапталга куустарбыт ол кэмнэрин ахтан-санаан «Анюта аллеята» диэн курус хоһоонун суруйбута. Оҕолор, ыччаттар бүөбэйдээн илдьэ кэлбит хатыҥ мастарын Анюта аллеятыгар олортулар. Кэнэҕэскитин бу хатыҥнар, силигилии үүнэннэр, ыраас таптал биһигини өссө киэргэтиэхтэрэ турдаҕа… Саамай кэрэхсэбиллээҕэ, Намнар Анна Семеновна төрөөбүт нэһилиэгиттэн – Хамаҕаттаттан түөрэн аҕалбыт хатыҥнарын олортулар. Бу маны үгүс сылларга кэпсии турар гына, үйэлээх үчүгэй көстүүлээх, бэлиэ оҥоһуллан ыйанара буоллар диэн баҕара санаатыбыт.    

Былырыыҥҥы көрсүһүүлэр кыттыылаахтара анаан-минээн чочуйан уһанан оҥорбут бэлэхтэрин – систээх скамейкалары аҕалан туруорбуттара. Ол курдук, барыта 11 скамейка турбута. Хайдах курдук үчүгэйий?!

Онтон уран тыл уустара Даниловтар талба талааннарын утумнааччы, салҕааччы ыччат дьоммутугар аналлаах «Көмүс күһүн алгыһынан» поэтическай күөн-күрэс ыытылынна. Айар талаан чаҕылыҥныы, кылбаҥныы оонньуур күрэҕэр кустук курдук куоһанан, ох курдук оҥостон барыта 9 хамаанда кыттыыны ылла.

Барыта 3 түһүмэх түмүгүнэн кыайыылааҕынан Сэмэн Данилов аатын сүгэр Бэрдьигэстээх орто оскуолатын үөрэнээччилэрин, эдэр учууталларын хамаандата ааттанна уонна сканерынан наҕараадаланна. II-с миэстэни Солоҕон нэһилиэгин ыччаттара, оҕолоро ыллылар уонна принтерынан наҕараадаланнылар. Интернет-камеранан III-с миэстэлээх Одуну нэһилиэгин хамаандата наҕараадаланна. Бары да наһаа маладьыастар!

Суруйааччылар биһирэбиллэрин Өрт орто оскуолатын 8 кылааһын үөрэнээччитэ Сидоров Женя, Сэмэн Данилов аатынан орто оскуола 9 кылааһын үөрэнээччитэ Лукшина Оля, Мытаах нэһилиэгин талааннаах ыччата Василий Тимофеев (былырыыҥҥы түһүлгэ арыйыытынан буолбута), Атамай нэһилиэгиттэн Диана Федорова ыллылар. «Дьүрүскэн» диэн ыччаттар литературнай түмсүүлээхтэрин хайҕаатылар. Драматург, прозаик Василий Егорович Васильев – Харысхал «драматургияҕа ылсан үлэлээтэр диэн кэтэх санаатын» Василий Тимофеевка биллэрдэ. «Кэскиллээх хоһоонньут» анал ааты уонна уруһуйдуур планшеты Нам хамаандатын эдэр кэскиллээх поэтыгар Ангелла Попова5а  туттардылар.

Кун иккис аҥарыттан төһө да ардахтаах буоллар элбэх хоһоон ааҕылынна, ырыа да ылланна… Поэзия түһүлгэтин кыттааччылара, ыалдьыттара бука-бары санаалара сырдаан, дууһалара байан, үлэлэригэр-үөрэхтэригэр саҥа тыын ылан, үгүс кэпсээннээх үөрэн-көтөн тарҕастылар. Эһиил күһүн Борго көрсүөххэ диэри!     

 Марина Потапова, Кииннэммит библиотечнай ситим методиһа,

СР культуратын туйгуна

 

Просмотров: 660 | Добавил: berlib | Рейтинг: 0.0/0
Всего комментариев: 0
avatar
Вход на сайт
Поиск
Календарь
«  Сентябрь 2015  »
ПнВтСрЧтПтСбВс
 123456
78910111213
14151617181920
21222324252627
282930
Друзья